1 В вечер же субботный (по вечери же субботнeм), свитающи во едину от суббот, прииде мариа магдалина и другая мариа, видeти гроб.
2 И се, трус бысть велий: ангел бо Господень сшед с небесе, приступль отвали камень от дверий гроба и сeдяше на нем:
3 бe же зрак его яко молния, и одeяние его бeло яко Сынeг.
4 От страха же его сотрясошася стрегущии и быша яко мертви.
5 Отвeщав же ангел рече женам: не бойтеся вы: вeм бо, яко Иисуса распятаго ищете:
6 нeсть здe: воста бо, якоже рече: приидите, видите мeсто, идeже лежа Господь,
7 и скоро шедшe рцыте учеником его, яко воста от мертвых и се, варяет вы в галилеи: тамо его узрите: се, рeх вам.
8 И изшедшe скоро от гроба со страхом и радостию велиею, текостe возвeстити учеником его.
9 Егда же идястe возвeстити учеником его, и се, Иисус срeте я, глаголя: радуйтеся. Онe же приступльшe ястeся за нозe его и поклонистeся ему.
10 Тогда глагола има Иисус: не бойтеся: идите, возвeстите братии моей, да идут в галилею, и ту мя видят.
11 Идущема же има, се, нeцыи от кустодии пришедше во град, возвeстиша архиереом вся бывшая.
12 И собравшеся со старцы, совeт сотвориша, сребреники доволны даша воином,
13 глаголюще: рцыте, яко ученицы его нощию пришедше украдоша его, нам спящым:
14 и аще сие услышано будет у игемона, мы утолим его и вас безпечальны сотворим.
15 Они же приемше сребреники, сотвориша, якоже научени быша. И промчеся слово сие во иудеех даже до сего дне.
16 Единии же надесяте ученицы идоша в галилею, в гору, аможе повелe им Иисус:
17 и видeвше его, поклонишася ему: ови же усумнeшася.
18 И приступль Иисус, рече им, глаголя: дадеся ми всяка власть на небеси и на земли:
19 шедше убо научите вся языки, крестяще их во имя Отца и Сына и Святаго Духа,
20 учаще их блюсти вся, елика заповeдах вам: и се, аз с вами есмь во вся дни до скончания вeка. Аминь.